Memoria de actividades do 2004

Entre as actividades que a Confederación de Fondos de Cooperación levou a cabo durante o 2004, cabe salientar:

• Relacións coa Axencia Española de Cooperación Internacional (AECI): no mes de xullo tivo lugar a sinatura do convenio de colaboración entre a AECI e a Confederación de Fondos no marco do Programa Azahar, que a posibilidade de que os Fondos de Cooperación participen neste programa de cooperación en materia de desenvolvemento sostíbel no Mediterráneo. Por outra parte, a AECI invitou á Confederación a participar nun obradoiro de diagnóstico sobre Fortalecemento Local en América Central, celebrado en Antigua (Guatemala) a comezos de setembro, a fin de identificar os principais problemas comúns do poder local. A partir das conclusións do obradoiro, ao que asistiu o director do Fondo Galego, en decembro celebrouse en Granada o Encontro de coordinación sobre cooperación municipal, coa participación dos xerentes do Fons Valencià e do Fondo Estremeño, no cal se definiron tres liñas de traballo no marco dun programa de fortalecemento municipal en América Central (formulación dun plan conxunto de cooperación municipalista na rexión, creación dunha páxina web como punto de encontro do municipalismo en Centroamérica e renovación e fortalecemento da Fundación para o Desenvolvemento Institucional e Local en Centroamérica).
  
  
• Participación na Comisión Interterritorial: durante o ano pasado os representantes dos Fondos participaron nas reunións do Pleno da Comisión Interterritorial (19 de xullo) e da Comisión Permanente (18 de outubro). Na xuntanza da Comisión Interterritorial celebrada o 19 de xullo acordouse, entre outros, iniciar os traballos para a creación dun Fondo Común de Axuda Humanitaria de Emerxencia, así como crear comisións específicas para traballar na homoxeneización da metodoloxía, financiamento, información e instrumentos da cooperación ao desenvolvemento. Por outra parte, constituíse a Comisión Permanente, na que a Confederación de Fondos de Cooperación e Solidariedade está representada polo seu presidente, Sr. Pere Navarro, exercendo como suplente o Sr. Miguel Ángel Morales, vicepresidente do Fondo Estremeño. Na sesión da Comisión Permanente do 18 de outubro aprobouse a constitución de 6 comisións de traballo para os seguintes temas: planificación, subvencións ás ONGD, axuda de emerxencia, avaliación, bases de datos, e sensibilización, estando representados os Fondos de Cooperación en todas elas. O grupo de traballo de Planificación reuniuse o 3 de decembro para valorar a proposta de Plan Director 2005-2008 e comentar as modificacións propostas ao respecto polos representantes da cooperación descentralizada. A Confederación elaborou un documento cos comentarios e emendas correspondentes, algunhas das cales foron incorporadas ao texto.
  
  
• Observatorio da cooperación descentralizada: no primeiro trimestre do ano entrou en funcionamento o Observatorio da Cooperación Descentralizada, que constitúe un espacio virtual emprazado na páxina web da Confederación de Fondos. O seu obxectivo é ofrecer un servizo de consultas especializadas sobre a cooperación descentralizada en tres eidos fundamentais e mediante tres bases de datos: sobre a cooperación que levan a cabo os Entes locais, sobre lexislación autonómica, estatal e europea, e sobre publicacións. O Observatorio pódese consultar en seis idiomas: castelá, catalán, euskera, galego, inglés e francés.
  
  
• Participación na Rede de Concellos Europeos pola Paz en Oriente Próximo: a Confederación de Fondos de Cooperación presta apoio á Rede de Concellos Europeos pola Paz ao Oriente Próximo, en cuias actividades participaron activamente algúns Fondos durante 2004. Coincidindo co congreso constituinte de Cidades e Gobernos Locais Unidos, celebrouse en París unha reunión da Rede, na que se puso en marcha a campaña de aprobación de resolucións de apoio á moción "Pontes e non muros entre Israel e Palestina" por parte das administracións locais europeas. En xullo o Fons Català formou parte da delegación de alcaldes europeos en Israel e Palestina, que se reuniron con autoridades locais, así como representantes das asociacións de concellos palestinos e israelís, autoridades palestinas e a delegación da Comisión Europea en Xerusalén. Por outra parte, o Fondo Andaluz e o Fons Català implicáronse na organización da Conferencia Internacional de Poderes Locais pola Paz en Oriente Próximo, cuia celebración está prevista para xuño de 2005 en Córdoba coa participación de representantes de redes municipalistas israelitas, palestinas e europeas.
  
  
• Incidencia na Unión Europea: no 2004 o proxecto de incidencia na Unión Europea foise consolidando, alcanzando un papel de interlocución en temas de cooperación ao desenvolvemento ante as institucións europeas, así como ante outras redes de concellos cooperantes europeos. O eixo central da actividade do ano pasado foi a solicitude de comparecencia ante a Comisión de Desenvolvemento do Parlamento Europeo co obxectivo de explicar qué son e cómo actúan as redes de concellos cooperantes en Europa. Por outra parte, a Confederación interviu na elaboración dunha serie de regulamentos, informes de opinión e informes de seguimento en temas de relacións exteriores e migracións, promoción da igualdade de xénero en cooperación ao desenvolvemento, asistencia técnica a países de América Latina, desvencellamento da AOD, etc
  
  
• Contactos con posíbeis xestoras de novos fondos: os representantes da comisión xestora do Fondo Asturiano de Cooperación, que estiveron presentes na Asemblea Xeral da Confederación de Fondos do 17 de maio en Bilbao, informaron que nestes momentos estase en proceso de ampliación da comisión, que está integrada por representantes de todos os partidos políticos de forma paritaria e conta co apoio da Coordinadora de ONGD, a Federación de Concellos de Asturias e a Axencia Asturiana de Cooperación. O Plan Cuatrienal da Cooperación Asturiana ao Desenvolvemento prevé a constitución do Fondo para o primeiro semestre de 2006. Por outra parte, o director de Euskal Fondoa ten participado en sendas xornadas celebradas en Santander e en Valladolid respectivamente, onde tivo ocasión de dar a coñecer a realidade dos Fondos de Cooperación. En ambos casos constatouse un gran interese pola tarefa que desenvolve a Confederación de Fondos, mais a falta de experiencia en cooperación por parte dos concellos fai prever que non será posible por en marcha un proceso de constitución duns fondos a curto prazo nas Comunidades autónomas correspondentes. Asemade, o Fondo Galego iniciou contactos con concellos portugueses que desenvolven tarefas de cooperación, que mostraron un gran interese cara o fenómeno dos Fondos de Cooperación, e se estableceron as bases para una posíbel colaboración co Fondo Galego.
  
  
• Publicacións: a comezos de novembro publicáronse as edicións en francés e en inglés, respectivamente, de Realidade dos Fondos de Cooperación 2001-2003, número 6 da colección da Confederación Cooperación local ao desenvolvemento municipal ao ldesenvolvemento. O libro recolle as iniciativas que os Fondos levaron a cabo conxuntamente como Confederación, así como unha perspectiva xeral da tarefa que ten desenvolto cada un dos Fondos de Cooperación que a conforman no período 2001-2003.
  
  
• Relacións institucionais internacionais: en maio, representantes do Fondo Andaluz, do Fondo Estremeño e do Fons Català participaron no congreso constituínte da nova organización internacional de administracións locais: Cidades e Gobernos Locais Unidos, que estableceu a súa sede en Barcelona. Igualmente a comezos de maio o Fons Català, o Fons Valencià e o Fondo Andaluz participaron no Foro de Autoridades Locais pola Inclusión Social, que tivo lugar en Barcelona, e no que se propuxo que o FAL se convertera nunha comisión dentro de Cidades e Gobernos Locais Unidos, sen que elo signifique perder a súa orixe ligada ao Foro Social Mundial. Por outra parte, constituíse unha comisión xestora encargada de preparar un documento de estatutos para crear a Rede de Cidades pola Inclusión Social no eido mundial. Asemade, o xerente do Fondo Andaluz estivo presente no Foro de Autoridades Locais celebrado en outubro en Londres, previo ao Foro Social Europeo, e a Confederación apoiou a celebración do Foro de Autoridades Locais de Málaga, organizado a comezos de decembro polo Fondo Andaluz, coa presenza do presidente do Fondo Galego e da xerente do Fons Català. Desde algúns Fondos tense colaborado na preparación do Foro Social do Mediterráneo, que está previsto que se celebre en xuño do 2005 en Barcelona.

Acceso direito a información relacionada con esta páxina