Memoria de actividades do 2003

Entre as actividades que a Confederación de Fondos de Cooperación levou a cabo durante o 2003, cabe destacar:

• Relacións coa Axencia Española de Cooperación Internacional (AECI): en xullo tivo lugar unha entrevista co Sr. Josep Ferré, responsable do Programa Azahar, que manifestou a vontade de subscribir acordos de colaboración cos Fondos de Cooperación, e integrar os seus proxectos neste Programa, que contempla actuacións en materia de desenvolvemento sostible, protección do medio ambiente e conservación dos recursos naturais no Mediterráneo. Tamén se participou nas Xornadas de Codesenvolvemento convocadas pola Oficina de Planificación e Avaliación da AECI, que tiveron lugar en Madrid os días 25 e 26 de setembro. O Fons Català e o Fons Mallorquí tiveron ocasión de expoñer a súa experiencia neste ámbito.
  
  
• Participación na Comisión Interterritorial: levouse a cabo o seguimento das diferentes Estratexias da cooperación española que se teñen discutido neste período: Estratexia para a promoción da Democracia e o Estado de dereito; Estratexia en Educación; Estratexia para a promoción do Patrimonio Cultural; e Estratexia para a promoción da Igualdade entre Mulleres e Homes. Presentáronse algunhas enmendas que foron aceptadas nas reunións do grupo de traballo conxunto da Comisión Interterritorial e o Consello de Cooperación, e valorouse positivamente o feito de que nalgunhas Estratexias se faga referencia explícita ós Fondos de Cooperación como axentes da cooperación descentralizada. Por outra banda, na reunión da Comisión Interterritorial do 5 de decembro presentouse un documento cos comentarios da Confederación de Fondos ó Plan Anual 2004.
  
  
• Taller técnico sobre xestión de proxectos: os días 29 e 30 de maio celebrouse en Calvià (Mallorca) un encontro de técnicos dos Fondos de Cooperación, co obxectivo de debater e intercambiar experiencias sobre a xestión de proxectos de cooperación, sensibilización e emerxencia que os Fondos levan a cabo de forma directa, ou ben a traveso de convocatorias para financiamento de proxectos a ONGD e outras entidades de cooperación. As xornadas, ademais de facilitar o coñecemento mutuo entre os técnicos dos distintos Fondos que constitúen a Confederación, resultaron moi útiles como espacio onde compartir experiencias entre persoas que traballan en áreas paralelas de xestión, pero dende lugares e circunstancias diferentes.
  
  
• Proxecto de incidencia na Unión Europea: o proxecto é froito da vontade dos Fondos de Cooperación de entender, coñecer e colaborar coas institucións europeas en tódolos temas que afecten ós ámbitos de traballo da cooperación ó desenvolvemento. A execución do proxecto durante o ano 2003 tivo tres fases: identificación das persoas, institucións e programas de ámbito europeo coas que se quere colaborar; presentación, dando a coñecer qué son os Fondos de Cooperación ante as institucións e persoas identificadas; e incidencia política, coa presentación, ante as instancias políticas europeas, dun documento consensuado que tiña como obxectivo que se tivera en conta a posición das redes de municipios cooperantes na futura base legal que regulará a cooperación descentralizada da Unión Europea.
  
  
• Publicacións: a finais de decembro publicouse Realidade dos Fondos de Cooperación 2001-2003, número 6 da colección da Confederación Cooperación municipal ó desenvolvemento. O libro recolle as iniciativas que os Fondos desenvolviron conxuntamente como Confederación, así coma unha perspectiva xeral do labor que ten realizado cada un dos Fondos de Cooperación que a conforman no período 2001-2003. Por outra banda, reimprimiuse 2º Encontro de municipalismo en Centroamérica, México e Caribe, da que se esgotara a principios de ano a primeira edición, de xaneiro de 2001.
  
  
• Observatorio da cooperación descentralizada: durante todo o ano 2003 traballouse n a conceptualización, deseño e desenvolvemento do Observatorio da cooperación descentralizada, que se estructura en tres grandes bloques: a base de datos sobre cooperación local, a base de normativa legal, e a de documentación. Púxose en marcha o proceso de recollida de datos sobre a cooperación que levan a cabo os entes locais nos ámbitos territoriais dos distintos Fondos, recompiláronse e sistematizáronse os textos e referencias legais relacionados coa cooperación descentralizada, e deseñouse o dominio virtual do Observatorio, que entrará en funcionamento no primeiro trimestre do 2004.
  
  
• Contactos con posibles xestoras de novos fondos: o 12 de novembro representantes do Fons Català e do Fondo Galego participaron nunha Xornada sobre os Fondos de Cooperación, celebrada en Oviedo, á que asistiron representantes de concellos, de ONGD e o director xeral da Axencia de Cooperación ó Desenvolvemento de Asturias. A comisión xestora do Fondo Asturiano de Cooperación, que agrupa a varios concellos e conta co apoio da Federación Asturiana de Concellos e a Axencia Asturiana de Cooperación, prevé que o Fondo estea operativo no primeiro trimestre do 2004.

  Polo que respecta ó Fondo Aragonés de Cooperación, tense seguido o seu proceso de constitución, que se ten ralentizado pola renovación dos cargos electos nas institucións locais e autonómicas coma consecuencia das eleccións do 25 de maio. A finais do 2003 estábase pendente da incorporación do Goberno de Aragón.

  Por outra banda, o 22 de novembro o Concello de Como (Italia) convidou á Confederación de Fondos a participar no taller As Metas do Milenio e o papel dos recursos locais, organizado polo propio Concello e a Administración Provincial de Como, co apoio do PNUD. Asistiron ó acto representantes de 15 municipios que están barallando a posibilidade de xerar un proceso de creación dun fondo de cooperación.
  

  
  
• Seguimento do proceso do Foro Social Mundial: a finais de xaneiro participouse no Foro de Autoridades Locais pola Inclusión Social, que tivo lugar en Porto Alegre (Brasil) no marco do III Foro Social Mundial. Así mesmo tívose presencia no Foro de Autoridades Locais celebrado en Saint-Denis, previo ó Foro Social Europeo, e dende algúns Fondos tense colaborado na preparación do Foro Social Mediterráneo, que está previsto que teña lugar en xuño de 2005 en Barcelona.

Acceso direito a información relacionada con esta páxina