Fondos en perspectiva

Nestes intres hai varias Comunidades Autónomas nas que se está traballando para por a andar procesos de constitución de novos fondos de cooperación, que se atopan en diferentes graos de consolidación:

• Aragón: a mediados do 2002 creouse unha mesa integrada polas tres Deputacións e os Concellos de Huesca, Zaragoza e Teruel, a Federación de Municipios de Aragón, a Confederación de Empresarios de Zaragoza, dúas caixas de aforros, dos representantes sindicais, de CCOO e UXT respectivamente, e o Goberno de Aragón, para impulsar o Fondo Aragonés de Cooperación, a existencia prevía a Lei relativa á cooperación ó desenvolvemento, aprobada polas Cortes Aragonesas en decembro do 2000. Nestes momentos estanse elaborando os estatutos, que engaden os 10 puntos do documento sobre o Modelo de Fondo da Confederación, coa vontade de facilitar así a súa incorporación.
  
  
• Asturias: a comisión xestora do Fondo Asturiano de Cooperación, que está integrada por representantes de todos os partidos políticos de forma paritaria e conta co apoio da Coordinadora de ONGD, a Federación de Concellos de Asturias e a Axencia Asturiana de Cooperación, atópase en proceso de ampliación e de elaboración dos estatutos. Por outra parte, o Plan Cuatrienal da Cooperación Asturiana ao Desenvolvemento 2004-2007, que contempla o apoio ao proceso de xestación do Fondo, prevé a súa constitución para o primeiro semestre de 2006.
  
  
• Castela-A Mancha: tamén neste caso a lei de cooperación prevé a creación dun Fondo. Houbo un intento de poñer en marcha o proceso dende o Goberno Autónomo, pero non tivo éxito. Despois dalgúns intentos infructuosos, agora parece que se retomou o proceso de definición do Fondo Castelá-Manchego e podería constituírse ao longo de 2005.
  
  Asi mesmo, polo que respecta ao eido europeo, durante os últimos meses de 2004 o Fondo Galego estableceu contactos con concellos portugueses que realizan tarefas de cooperación ao desenvolvemento. Despois dun encontro celebrado o 1 de outubro en Baiona entre concellos de Galicia e de Portugal, co propósito de intercambiar experiencias sobre a forma de abordar a cooperación descentralizada, fóronse concretando máis aproximacións:
  - O 24 de novembro tivo lugar en Loures (cerca de Lisboa) o encontro Os desafíos da cooperación e o desenvolvemento local, no que participaron unhas cincuenta persoas, representantes de concellos tanto portugueses como de países do Sul, de ONGD e profesores universitarios. Presentouse un relatorio sobre a experiencia da cooperación descentralizada no Estado español, e máis concretamente, dos Fondos de Cooperación, que se valorou moi positivamente.
  - O 25 de novembro desenvolveuse un encontro coas autoridades da Cámara Municipal de Palmela, no que se constatou o interese por potenciar o asociacionismo en Portugal en torno á cooperación e adoptáronse algúns acordos, entre os que cabe salientar a celebración en abril dunha conferencia en Palmela sobre cooperación internacional e asociacionismo local, aberta a responsábeis políticos e técnicos do eido local de todo o país; a elaboración dun inventario da cooperación ao desenvolvemento en Portugal no eido local; e a edición en portugués dalgunhas das publicacións da Confederación de Fondos.
  
  Actualmente hai uns cincuenta concellos portugueses que traballan en cooperación, maioritariamente dirixida a países africanos de expresión portuguesa, que mostran gran interese ante a posibilidade de crear un fondo de cooperación, aínda que falta por concretar se se definirá sobre unha área territorial ou en función do grupo de países cos que se coopera.

  
  

Acceso direito a información relacionada con esta páxina