Fons Català de Cooperació al Desenvolupament

O Fons Català de Cooperació é un organismo sen ánimo de lucro nado en xullo de 1986 coa vontade de ser un organismo no que puidesen confluír tódalas institucións públicas (concellos, consellos comarcais, deputacións e Generalitat), co fin de contribuír dende o ámbito catalán ó desenvolvemento dos países máis empobrecidos do planeta, así como a estimulación da participación cidadán mediante campañas informativas. Na actualidade ten 289 socios, entre eles hai 259 concellos que concentran o 85% da poboación catalana.

As súas prioridades delimitáronse en dous marcos de traballo:

a) Marco temático: centrado en fomenta-lo municipalismo e desenvolvemento local, o programa de migracións e desenvolvemento, a promoción dos dereitos humanos e dos pobos, así como o desenvolvemento humano e sostible.

b)· Marco xeográfico: distribuído en 5 áreas, centrado sobre todo en América Latina (con especial interese en Centoamérica e Caribe), o Mediterráneo e África Subsahariana, e tendo en conta tamén, en menor medida, iniciativas en Europa ( só en situacións de emerxencia posbélica) e Asia.

Delimitáronse tamén unhas liñas estratéxicas de traballo para promove-la cooperación descentralizada ó desenvolvemento e o desenvolvemento integral de persoas e comunidades dos países periféricos, así como para sensibilizar á poboación do Norte fomentando a comprensión doutras sociedades e culturas

As dúas entidades que agrupan os concellos cataláns, a Associació Catalana de Municipis i Comarques (ACMC) e a Federació de Municipis de Catalunya (FMC), son organizacións colaboradoras do Fons que instan ós seus integrantes a se asociar no Fons Català. O Fons ten como entidade protectora á Generalitat de Catalunya e é membro do Consell de Cooperació da Generalitat dende a súa constitución en 1995. Así mesmo, a raíz da aprobación da Lei catalana de cooperación ó desenvolvemento (Lei 26/2002, de 31 de decembro), o Fons Català é membro da Comisión de Coordinación cos Entes Locais.

Acceso direito a información relacionada con esta páxina