Lege esparrua

Estatuan

23/1998 Garapenerako Nazioarteko Lankidetzari buruzko Espainiako Legeak, uztailaren 7koak, autonomia erkidegoen eta tokiko erakundeen garapenerako lankidetza aitortzen du esplizituki, eta 23. artikuluan hau dio Lurralde arteko Batzordeari buruz: “Batzorde horien osaera eta funtzionamendua legez arautuko da, eta autonomia erkidegoen, tokiko erakundeen edo horiek ordezkatzeko baimena duten udalez gaineko koordinazio erakundeen presentzia eta parte hartzea bermatuko da”.

Lurralde arteko Batzordearen osaera eta funtzioak garatzen dituen erregelamenduan (BOE, 22/2000 urtarrilaren 14ko Errege Dekretua) Lankidetzarako Fondoak aitortzen dira esplizituki, hau esaten baita 4. artikuluan: “Estatuko zabalkunde handieneko elkarteak, bere barne prozeduren arabera, 19 ordezkari aukeratuko ditu, hauen artean: aurrekontuetan garapenerako diru laguntza ofizialtzat izendatutako fondoak kudeatzen dituzten tokiko erakundeen artean, edo haiengandik lan horren ardura jaso duten udalez gainetiko erakundeen artean, batez ere Lankidetzarako eta Elkartasunerako Fondoak kudeatzen dituzten artean”.

Autonomia Erkidegoetan

Azkenaldian, lankidetza legeak egiteko eta onartzeko prozesuak jarri dira abian hainbat autonomia erkidegotan, eta Lankidetzarako eta Elkartasunerako Fondoen funtzioak jasotzen dituzte esplizituki.

Katalunia

26/2001 Garapen Lankidetzarako Legeak, abenduaren 31koak, hau dio tokiko erakundeekin Koordinazio Batzorde bat sortzeari buruz, 23. artikuluaren 5. puntuan: “Tokiko Erakundeekin Koordinatzeko Batzordean, Generalitateko sailetako eta erakundeetako ordezkariek, probintzietako eta tokiko erakundeetako ordezkariek eta Garapen Lankidetzarako Kataluniako Fondoko ordezkariek parte hartzen dute, ordezkari kopuru berarekin. Batzorde horretako presidentea kanpo jardueretarako kontseilaria da, eta zeregin batzuk dagokion zuzendari nagusiaren esku utz ditzake”.

Koordinatzeko eta elkarlanerako organoak eta Lege horren kontsulta organoak arautzeko erregelamendua garatu behar izan da, eta prozesu horretan oso garrantzitsua izan da Fons Català, bai kualitatiboki, bai kuantitatiboki. Hori apirilaren 15eko 105/2003 Dekretuan ikusten da. Tokiko Erakundeekin Koordinatzeko Batzordean parte hartzen du. Batzorde horren zeregina informatzea, aholkuak ematea eta koordinatzea da; presidenteorde 1 eta 3 batzordekide ditu, eta fondoaren gerentziaren ardura duen pertsonak bileretan parte hartzeko eskubidea du, baina ez bozkatzeko (17. artikulua). Garapen Lankidetzarako Batzordea garapenerako lankidetzaren arloan parte hartzeko eta aholkuak emateko Kataluniako Autonomia Erkidegoaren erakundea da, eta Fons Catalàk kide bat du (20. artikulua).

Aragoi

Aragoako Gorteek Garapenerako Lankidetzari buruzko Legea onartu zuten 2000ko abenduaren 14an; bertan, Garapen Lankidetzarako Aragoiko Fondoa sortzea aipatzen da, 2. xedapen gehigarrian:

1. Aragoako Autonomia Erkidegoko administrazioak Garapen Lankidetzarako Aragoako Fondoa sortzea sustatuko du, eta, Fondo hori sortzeko, erakunde hauek izango dute diru laguntzak emateko aukera: Aragoiko administrazio publikoak, garapen lankidetzarako gobernuz kanpoko erakundeek, arlo horretan lan egiten duten erakundeek eta garapenerako lankidetza laguntzeko, handitzeko eta koordinatzeko asmoz dirua ematen duten partikularrek
   
2. Fondo hori legea indarrean jarri eta hemezortzi hilabetera sortuko da.

Aragoiko Gobernuaren urtarrilaren 22ko 22/2002 Dekretuan, Garapen Lankidetzarako Aragoako Kontseiluaren Erregelamendua onartu zen. Legeak aurreikusten duenez, organo hori nazioarteko elkartasunerako eta lankidetzarako kontsulta eta laguntza erakundea izango da, eta Fondo Aragonés de Cooperacióneko ordezkari bat bertako kide izango da (3. artikulua).

Gaztela-Mantxa

Garapenerako Nazioarteko Lankidetzari buruzko Legea 2003ko otsailaren 13an onartu zen, eta, V. atalean Fondo Castellano-Manchego de Cooperación sortzea aipatzen da. Sortzeaz gain, haren osaera eta baliabideen jatorria ere zehazten du (11. eta 12. artikuluak). Horrez gain, tokiko erakundeek eta pertsona fisikoek eta juridikoek fondoan parte hartzea sustatuko du Gaztela-Mantxako Komunitateen Batzordeak; horretarako, dirua ematen duten pertsonei diru pizgarriak ematea aurreikusten du, bai eta fondoari diru laguntzak ematen dizkioten tokiko erakundeei eta enpresei edo erakundeei diru laguntzetarako lehentasuna ematea ere (13. eta 14. artikuluak).

Galizia

Gerora, ekainaren 19ko 3/2003 Legeak, Galiziako garapenerako lankidetzari buruzkoak, Fondo Galegok tokiko lankidetzako berezko eredu bat garatzen izan zuen garrantzia onartzen du sarreran:

“Gainera, Fondo Galego de Cooperación e Solidariedade sortzeak, Galiziako Udalen eta Probintzien Federazioaren eta Erkidegoko Administrazioaren laguntzaz, Galiziako udalek beren jarduera ildoari jarraitzea ahalbidetu zuen. Ildo horren ondorioz, lankidetza egitasmoetan eta programetan parte hartzea sustatzen da, atomizazioak eta bikoiztasunak saihesten dira, eta norberaren autonomia inola ere ezabatzen ez duen lankidetzaren alde egiten da.”

Bestalde, lege horrek berak Fondoak Garapen Lankidetzarako Lurralde arteko Batzordean parte hartzea aurreikusten du 20. artikuluan. Batzorde hori Xuntaren eta tokiko administrazioen arteko koordinaziorako eta elkarlanerako erakundea da: “3. Garapen Lankidetzarako Lurralde arteko Batzordearen osaera eta funtzionamendua arauz zehaztuko da. Dena dela, osaera paritorioa izango du, eta bertan Fondo Galego de Cooperación e Solidariedadeko ordezkariek parte hartuko dute”.

Extremadura

2004-2007 Garapen Lankidetzarako Extremadurako Plan Orokorrak -2004ko apirilaren 2an Extremadurako Legebiltzarrak onartua- atal bat eskaintzen dio Garapen Lankidetzarako Extremadurako Fondoari, baliabideei eta fondo ereduei buruzko kapituluan hain zuzen. Atal horretan, lankidetza fondoen funtzioa aitortzen da espreski, eta Extremadurako Fondoari laguntza ematea aurreikusten da:

"Gure inguruko eskualdeetan darabilten baliabiderik interesgarrienetakoa Lankidetza Fondoak eratzea da. Garapen Lankidetzarako Extremadurako Tokiko Fondoa (FELCODE) eratzea eta handitzea sustatuko da, Extremadurako Autonomia Erkidegoko beste erakunde publiko eta pribatu batzuekin elkarlanean.
(...)
Extremadurako Fondoa baliabide egokia da tokiko erakundeek lankidetzan duten inplikazioa bideratzeko eta sustatzeko. Fondoaren helburu garrantzitsuenetakoa lankidetzan laguntzeko gero eta tokiko erakunde gehiago izatea da, hemendik gutxira aurrekontuen %0,7ra iristeko".

Onarpen hori Garapenerako Lankidetzaren Extremadurako Funts Lokalean ere islatzen da, otsailaren 9ko 37/2005 eta 38/2005 dekretuek arautzen dituzten kontsulta- eta koordinazio-organoetan. Bi dekretu horien bidez, Funtsari batzordekide bat esleitzen zaio Garapenerako Lankidetzaren Aholku Kontseiluan (3. artikuluko e atala) eta beste bat Garapenerako Lankidetzaren Autonomia Batzordean (3. artikuluko e atala).

Horri dagokionez, honako hau azpimarratu behar da: 2005. urterako Extremadurako Lankidetzaren Urteko Planak (2005eko urtarrilaren 22ko DOE, 8. zk.), urte horretarako antolatutako ekintzen artean (h atala), Garapenerako Lankidetzaren Extremadurako Tokiko Fondoarekin (FELCODE) hitzarmenean aurreikusitako ekintzak burutu nahi ditu. Era horretan, Latinoamerikako udalerriak indartzeko proiektuak garatu eta, bi aldeek hala irizten diotenean, horiek hedatuko dituzte.

Asturias

Asturiasen, 2004-2007 Garapen Lankidetzarako Asturiasko Lau Urteko Planak Lankidetzarako Asturiasko Fondoa sortzeko prozesua bultzatzea aurreikusten du. Hori adierazten da 8. kapituluan, erakunde arteko koordinazioari buruzko atalean:

"Garapen eta Elkartasun Lankidetzarako Asturiasko Fondo bat sortzea sustatuko da. Fondoak garapen lankidetzari buruzko informazioa eta estrategiak koordinatuko ditu, eta, bertan, udalek hartuko dute parte, hala erabakitzen badute.
Hortaz, irizpide homogeneoak ezarri nahi dira, ekintzen bikoiztasuna saihesteko eta koordinaturiko jarduera lerroak errazteko."

10. kapituluan (lau urteko planaren proposamenen epeei buruzkoa), fondoa 2006ko lehen seihilekorako eratzea ezartzen da.

Balearrak

Garapenerako Lankidetzaren 9/2005 Legeak (2005eko ekainaren 21ean onartua), 29. artikuluko 1b puntuan, esplizituki lankidetza-agentetzat onartzen ditu Balearretako lankidetza-funtsak (Fons Mallorquí de Solidaritat i Cooperació, Fons Menorquí de Cooperació eta Fons Pitiús de Cooperació); eta, era berean, funts horien egituratze-lana baloratzen du, honako adierazpen honen bitartez (21. artikulua, 3. puntua): "Balearretako Gobernuak lankidetza-politika aktiboa izan behar du uharteko kontseiluekin eta garapenerako lankidetzari baliabideak ematen dizkieten Balearretako tokiko erakundeekin. Bereziki, Balearretako tokiko erakundeek garapenerako lankidetza-ekintzetan parte hartzea bultzatu behar du Gobernuak, tresna mankomunatuen, administrazio arteko partzuergoen edo antzeko ezaugarriak dituzten beste erakunde batzuen (esaterako, uharteetako lankidetza-funtsak) bidez".

Bestalde, Balearretako hiru funtsek koordinazio- eta aholku-organoetan parte hartu behar dutela ezartzen du Legeak; hain zuzen ere, Garapenerako Lankidetzaren Kontseiluan (27. artikuluko 2. puntuan) eta Lurralde Erakundeen Koordinazio Batzordean (28. artikuluko 1. puntuan).

Orrialde honekin lotutako informaziora zuzenean